Берий суртий гойтам хьабийллар, Магасерча культуран дегIаахара моттиге
Къамаш цхьанкхетара Денна хетабаь берий суртий гойтам хилар Магасе. Къамаш шоайла вIашкаозаш, юкъера барт, безам чIоагIбеш дола цIай хилар кхетаченах. Кхоллама кружокашка ихача бераша шоай начIал гойташ дола тайп-тайпара сурташ довзийтар цига. «Шоаш дехкача сурташка вай мехкара хоза моттигаш, Iалам, республике бахаш болча тайп-тайпарча къамий наьха вахар, Iадаташ гойта хьежадар бераш. Культуран оагIонцара кхоане гойташ дар хIара сурт. Шоай балхашка гIолла, вахаре эггара лоархIамегIа дола хIамаш: машар, цхьоагIо, безам - лорабар долга хьахьокха хьежабар къона суртанчаш», - дийцар «Сердалога» цу моттигера.
Иштта кхетачене хьабийллар Хамхой Лидай гойтам. Лоаман мехкарий дувхар гойташ йола теникаш хьаю Лидас ший кулгашца. Къаман Iадаташцара лерхIам хоаболийташ бар цун хIара болх.
Къаьстта йоккха терко тIаозаш бар «КIаьда дуне» яхача кружока кулгалхочо фертах вIашагIделла республикан технологически карта. Фертах мел тамашийна хIамаш хьакхолла йиш я ший кулгашца гойтар цо. Таханара ха йовзийташ, селханара къаман дIаьхий, доккха истори, культура белгалъеш бола болх массане бIарг тIаотташ хилар.
