Магасерча дешара Центре дагалоаттама беш дIаегIар
Магаса дешара Центре, «Дагалоаттама беш» яхача халкъашта юкъерча болама чудоагIаш, 100 совгIа га дIаегIар. Эггара чIоагIагIа хьинар долаш дакъа лоацаш бар цига ГIалгIай Республикан Iалама Министерствон болхлой, шоашта керте Мизенаькъан Микаил а волаш. Иштта царца цхьана, Сийлахь-боккхача Даьймехка тIема Коталон 80 шу дизара хетаяь дагалоаттама беш дIаювш хилар Магас шахьара дешара Центра хьехархой а дешархой а; цул совгIа, цига бар ГIалгIайчен, Нохчий Республикан, Къилбаседа ХIирийчен-Алане Юкъарча Палата викалаш.
«Дагалоаттама беш» яха Халкъашта юкъера болам - из духхьал гаьнаш дIайогIар хинна Iац, из я вай даьша гойта майрал, денал, дунен тIа машар хилийтара цар хьийга къа доацадар, уж дагалоаттабеш хилар. «Дагалоаттама беш» вайна маьрша дуне цар дитарах оалаш дола баркал да.
Белгалду, вай республике дIахьош ба Даьхенцара безам совбоаккхаш бола болам, массадолча хьун доазонаш тIа дIайогIаш я гаьнаш.
«Ерригаш а дIайогIа лаьрхIараш 87 эзар га я», - аьлар «Сердало» газетага ГIалгIайчен Iалама Министерствос.
