Даь Ди дездеш, Илдарха-Гӏалий тӏа дешархой кхетаче дӏайихьар СВО бӏухочун даьца
Даь Ди белгалдеш хиларца, «Даьхен лорабой» ганза филиала вӏашагӏделлар Илдарха-Гӏалан №4 йолча юкъерча ишкола дешархошца, Лаьрххӏача операце бӏухочун даьцара вӏашагӏкхетар.
Ардара бетта кхоалагӏча кӏирандийнахьа дӏахьош дола цӏай хиларах, берий таро хилар дас малагӏа дакъа лоац ха, Даьхенцара безам сов боаккхача даькъ тӏа. Цига дакъа лаца вена хилар Афгански тӏема бӏухо Маматанаькъан ӏийса, ший воӏаца Батыраца - СВО доакъашхочунца; иштта шахьара кхела кулгалхочун гӏонча Амаканаькъан Хьусен, Украине дӏахьош йолча лаьрххӏача операце ветеранаш Баденаькъан Зураб, Йовлой Мухьмад.
Хьаьшаша дийцар дукхагӏча даькъе Даьхенцара безам совбоаккхаш дола къамаьл, иштта амал дар лоархӏаме хилар, российски бӏухой турпалалах, майра къонгаш кхебеш дас юкъедахьаш долча даькъах, уж Даьхен хьашташ лораде кийча хила безарах.
Ганза болхлоша яхачох, кхетаче эшаш яр из лоархӏаме ди дагадохара а, иштта кхувш боагӏараш толамаш даха кийча хилийтара а.
