ГӏалгӀайчен Галерейна совгӀата делар нускала чокхи
ГӏалгӀайчен культуран тӀехьален мах барашта тӏакхийтар цхьаькха еза тӀехьале - суртанчас-модельера, кулгаговзалца белгалъяьннача Хамхой Лидас совгӀата белар, Паччахьалкхен гойтама галерее даим хургболаш, маьре додача нускала тӀабувхабу гӀирс, цун чуйоагӀаш я дукхача шерашка денз лелаеш йола хозала кеп, гӀалгӀай къаман культуран къайленаш.
«Из гӀирс ба сийрдача беса, дегӀ къайладоаккхача кепара. Цо белгалду цӀенал, сий, гӀулакх лацар; цунца цхьана хьагойт гӀалгӀай къаман культуран мах бараш, кхалсаг сий долаш хилар, цӀен кхуврч лорабеш йола дезалера керттера моттиг цо лелаеш хилар.
Ӏадаташка хьежжа маьре кхухьача барзкъанна юкъедоагӀаш да керттердараш - наькх тӀа доалладу дотув, керта тӀа туллабу гӀирс, тӀехкар, хозала хьадаь кхыдола зӀамига куцаш. Нускала дувхар, кийчдаь хиларал совгӀа, бӀаьшерашка денз хьадоагӀача Ӏадатий лерхӀамца дувзаденна да. Ахьмада Лидас даь совгӀат мах болаш да исбахьален, культуран белгалон масал хиларах тарра», - аьлар «Сердало» газетага ГӏалгӀай Республикан Паччахьалкхен гойтама галерея кулгалхочун гӀончас Янданаькъан Рашида.
Хӏанз гӀалгӀай Ӏадатий хьоалчагӀан гӀирса ший моттиг хургья, галерее масса хана го йиш йолаш. Цу таро лу дӀаяхача а, иштта хургйолча а замай къаман белгалонаш хозалга гӀолла лорае.
