«Юртара ФАП харцар кхерам болаш, дукха кхоачамбоацараш долаш латт. Цигара гIулакх тохкаш болхлошца къамаьл даьчул тIехьагIа,  соцам бир, юртара администраци чуйолча гIишлон чу из гIулакх тоадаллалца кабинет хьаелла. ФАП тоаеш болх дIабаххьалца, е кердаяр хьалъялцца цу чу хургья бахархой тIауха моттиг», - йоах хоамо.

Министерствон кулгалхочо белгалдир, бахархой лорашкара гIо доацаш бита йиш йоацилга. Боккхийчарна даржаш долча лазарашта духьала маьхий тохаш, деррига бераш чакхдоахаш, болх дIахьо аьнна, тIадиллар цо.

 «Хан-ханнахьа лорашка чакхвоалаш, ший унахцIенон хьал лорадеш хиларо наха юкъе лазараш даржийтац», - аьлар Антошканаькъан Заремас.