Россе кепайоазон Денца дувзаденна, мехкарча журналисташка къамаьл дир Мехкадас
Россе кепайоазон Ди дездеш, вай мехкарча журналисташка, уж даькъалабувцаш, къамаьл дир мехкадас Келаматанаькъан Махьмуд-ӏаьлас. «Республикан кулгалхочо белгалдир, вай мехка массахана лакха начӏал дола, шоай болх боаггӏача боараме кхоачашбеш бола журналисташ хиннилга.
Дуккхача шерашка къахьегаш, шоай гӏулакх дизза дӏахьош хьабоагӏаш бола нах ба уж. Журналисташа дӏахьош бола никъ лоархӏаме, лакха говзал, хьинар эшаш болга белгалдеш да кепайоазон Ди. Журналиста эггара лоархӏамедар да; бакъдар, нийсадар хьаллоацаш, ший декхараш боаггӏача боараме кхоачашдеш къахьегар», - йоах Мехкадас ший къамаьла юкъе. Цо белгалдечох, тахан тайп-тайпара керда технологеш яржаш латташ ха яле а, кепайоазон болх лоархӏаме ба тхьовра санна. Бахархошта бакъдола хоамаш довзийташ бола оагӏув ба из.
«Лоархӏаме кепайоазон болхлой! Шоай декхараш оаш боаггӏача боараме дӏахьош хиларах; нийса, бакъдола хоамаш довза аьттув ба вай бахархой. Журналистике лоархӏаме моттиг дӏалоацаш, из йоаржаеш къахьегаш дола, вай къаман мотт лорабара тӏехьа доккха дакъа дӏалоацаш нах да шо. Иразе, аьттув болаш, беркате хилба шун вахара, кхоллама никъ! Могаш, маьрша долаш, шоай декхараш хӏанз санна дизза кхоачашдара тӏехьа латташ дӏачакхдалда шо!» - аьлар вай мехкадас Келаматанаькъан Махьмуд-ӏаьлас.
