ВорхӀ кердача ишколо шоай наӀараш хьайийллар тахан, дешархой тӀаэцаш
Дешара оагӀонца дикка хувцамаш долаш дӀадоладелар дешара шу вай мехка. Дешара шу долалуча дийнахьа ворхӀ керда ишкол, цхьа берий беш хьайийллар мехка.
«Керда хьайийлларашта юкъе я Наьсарера № 23 йола 720 бера моттигаш луш йола ишкол, Берда-Юртара 250 бера моттигаш луш йола ишкол, Йоккхача Ачалкхера 420 бер тӀаэцаш йола № 9 йола ишкол, Магасера 704 бера моттигаш луш йола № 3 йола ишкол, ТӀой-Юртара 220 бер тӀаэцаш йола «Аист» яха берий беш. Еррига дешара моттигаш «Дешар» яхача къаман проектага гӀолла хьалъяь, дешареи Ӏилмани гӀулакхех йолча министерствогара лицензи йолаш хьалъяь я», - дийцар «Сердалога» министерствон болхлоша.
Еррига ишколаш таханарча хано дӀадеххача тайпара кийчъяь, эшаш мел бола кхоачам чуболаш я. Спорта лаьрхӀа йоккха залаш, шера библиотекаш, иштта кхыдараш да ишколашка. Лакха терко яьй кхерамзлен хьалаца бувзабеннача балха. Лаборатореш, аьшкаца, дахчанца балхаш де пхьоаллеш, даа хӀама кийчде Ӏомабеш йола моттигаш, кхыча къамий метташ Ӏомаде кийчъяь латташ кабинеташ, компьютерий классаш, лорий кабинеташ, хӀама даа паргӀата моттигаш, иштта дуккха кхыдараш да кердача ишколашка берий дог гӀоздаккха.
Мехка кулгалхоша белгалду, дешара оагӀонцара хьал тоадар мехка хьалхашка латтача керттерча декхарех долга. ТӀехдика деша, дукха говзалаш Ӏомае берашта мел эшар тахан вай ишколашка Ӏалашдаьд, хӀаьта берашта хьалхашкара декхар - цу дерригача хӀаман хам беш, дика дешаш дӀачакхдалар.
