Библиотекашка Коазой Нурдина книжка кхаьчад
ЦӀихезача Москверча книжкаш арахецача ГӀазданаькъан Жамбулата, мехка берий библиотекашта совгӀата ше Коазой Нурдина цӀерагӀа арахийца «Седкъан къегар» яха книжкаш делар. Книжканна чудолхаш да автора тайп-тайпарча ханашка яздаь хинна фаьлгаш.
«Коазой Дауда Нурдин массанена вовзаш ва Ӏилманхо-историк, кавказовед, дукхача Ӏилман балхий, дошлоргий автор хиларах тарра.
Из кхы а начӀал дола литератор вар, цо хьакхоллар поэтически йоазош, уж дукхагӀча даькъе берашта хетадаь дар.
Цун байташца даь берий йоазош массане а дика кхетадеш дар. Царна чудоагӀаш хулар кхыметтел боккхагӀчарна а вахаре накъадаргдола маӀанаш»,- аьлар «Сердало» газетага ГӀалгӀайчен Къаман библиотекан зарбан болх лелабераша.
Коазой Нурдина фаьлгаш белгалдоалаш да ший тайпара даьча йоазонца, чулоацамца, маӀанца, лоархӀамеча хӀаман кӀоаргга уйла яйташ уж хиларца. Цар берашта безам чубоссийт гонахьарча Ӏаламцара, иштта уж Ӏомаду дуне деза. Цар новкъостал ду къонача дешархошта гонахьардар довза, деза, цун мах бе, иштта кхетам лу кагирхошта.
