Коталон 80 шу дизара хетаяь кхетаченаш хул берий бешамашка
Боккхача тӀем тӀа Котало вайга йиса 80 шу дизара хетаяь кхетаченаш я, мехкарча берий бешамашка дӀакхухьаш. Бераш шоай Даьхе езаш, лоархӀаш, Котало гаргайоалаеш лаьттараш биццабара тӀахьехаш, лоархӀаме болх ба из. «Сердалога» из хоам бир дешареи Ӏилмани гӀулакхех йолча Министерствос.
ТӀема-спорта, кхоллама ловзарашка дакъа лоацаш, тӀемах лаьца иллеш дӀаоалаш, байташ ешаш да бераш. «Лозаваьча бӀухочунна гӀо де» яха ловзар дӀахьош, «Ӏайха тохар нийса тоха» яха яхьаш, иштта «Коталон Кораш», «Лергдоаца сур», «ГӀарагӀурилг» яха ерригача Россе боламаш хьаллаьцар берий бешамашка.
Берашта тӀема истори довзийтара, тӀемах лаьца сурташ дахкара, тайп-тайпара цу оагӀонцара кхетаченаш чакхъяхара къаьстта йоккха терко тӀаяхийтар хьалхалаттараша. Хьехархоша белгалдир, иштта йола, Даьхенцара безам совбоаккха кхетаченаш берашта юкъе тахан лоархӀаме йолга.
