«Аьрзи» яхача берий лагере, хьайийллар «Россе аьрзелгий доттагӀал» яха смена
Жӏайрахьа кхален даькъ тӀарча берий могашал тоаеча «Аьрзи» оалача лагере хьайийллар кхаь кӀира хургйола «Россе аьрзелгий доттагӀал» яха смена, яхаш, дийцар «Сердало» газетага Ерригроссийски «Бералла наькъаш» яхача проекта викал йолча Коазой Миланас.
Моаршал хоатташ долча дешаца берашка йистхилар лагера кулгалхо Чуранаькъан Мадина, «Бералла наькъаш» проекта болх лелабеш вола Колой СаӀад, кагирхой гӀулакхех йолча Комитета кулгалхо Малсаганаькъан Адам. Майдан тӀа дӀадихьар гулбалар, даьре оасашцара халхараш, тешамах дув баар. Цига гулбеннарий безам совбоаккхаш дар Ольховская Алисас дӀааьнна «Са оаз» яха илли, Беканаькъан Беллай композици «Магас», иштта Чуранаькъан Луизас «Россия» яха илли дӀааьлар, - йоах хоамо.
Дешархой дика салаӀа йиш йолаш ба, цига салаӀарал совгӀа, дешара керда оагӀонаш а йовзаргья. Смена дӀахьоргья доккхача дешашца: «Тахан тхо-аьрзелгаш да, хӀаьта кхоана тхо-аьрзеш да! Тхо даьд ираза, гӀаттара, безама!»
«Аьрзеш-уж шо да, оалхазараш, хӀанз мара гӀатта долалуш доаца, оаш из тешшаме, лакха, хоза дергдолаш, шоана новкъостал ду цу тӀехьа шун даьша, хьехархоша, новкъосташа», - аьлар Колой СаӀада.
