Яндаре бахача наьха цӀагӀа чуяьлар борцакх
24.05.2024 12:40
Тамашийна хьаьша вера Яндаре, Гасанова урам тӀа бахача наьха цӀагӀа. Цига бахаш болча наьха цӀагӀа чуера борцакх, из хоам бера «Служба 112» яхача моттиге. Цох дийцар «Сердало» газетага ГӀалгӀайче гӀолла йолча Россе МЧС зарбан болх лелабераша.
«Наха гӀо деча гӀулакха тӀарча болхлоша, шоаш массаза балха леладеча гӀирсашца хьайба хьалаьцар, цу цӀен бахархой а паргӀатбаьхар. Цул тӀехьагӀа, зене йоацача моттиге борцакх дӀахийцар, цун ше лела Ӏемача юхаяха таро хургйолаш», - аьлар тхога.
Из нийсденнача моттиге къахьегаш хилар «Илдарха-ГӀала» яхачара лахара-кӀалхарваккхара болхлой, цар акха дийнат хьалаьцар, гӀулакх дика чакхдаьккхар. Сага зе хинна моттиг яц.
