Дерригача дунен книжкаш дезарий Ди дездеш хилар Яндарерча культуран цӀагӀа
Яндарерча культуран цӀагӀа дерригача дунен книжкаш дезарий Ди дезде гулбелар. Юртара бераш даьхкар кхетаче дакъа лаца.
«Культуран цӀагӀа исбахьален оагӀонцара болх дӀахьош йолча Йовлой Мадинас «Книжка - сага эггара дикагӀа вола доттагӀа» яха кхетаче кийчъяьяр берашта. Царна хьалхадаьккхар, массахана книжкашца бувзам лоаттабеш хилар, книжкаш дезаш вахар моллагӀча сага деношка мел лоархӀаме да. Йовлой Мадинас царна дийцар, книжкаш дешаш вола саг массахана, моллагӀча моттиге белгала хулилга, цун кхетам дикка лакхлулга, книжкаша саг нийса, боаггӀача боараме къамаьл дӀаде Ӏомавелга. Вай къаман цӀихезача йоазонхоех, лоархӀамеча произведенеех дийцар цига», - йоах «Сердалога» бенача хоамо.
Бераш чӀоагӀа раьза долаш дӀаяхар кхетаче. ХӀаране аьттув бар шийна эггара дукхагӀа дезача книжках дувца, цар авторий истори довза.
Книжкашцара безам кхувш латтача тӀехьен юкъе боаржабар чӀоагӀа лоархӀаме да тахан. Массахана книжкаш дешаш вола саг дуккхача хӀаман хьалха волга кхетаду вай.
