Наьсарера ши ишкол мишта тоаю хьежар
Наьсарера №9, №10 йола ишколаш тоаеш дӀабихьача балхага хьажа арабаьлар дешареи Ӏилмани гӀулакхех йолча министерствон хьалха латта Цхьорой Ахьмад-Башир, Халкъа Гуллама кулгалхо ТӀумхой Мухьмад. Из хоам «Сердалога» бир министерствера.
Карарча хана тӀера тхов, кораш, наӀараш хувцаш боахк ишколашка. ШоллагӀча тоабо хий, ток чуюллаш, видеотӀахьожам оттабеш латт, иштта чура балхаш йистедоахаш боахк цига.
Кастта Ӏооттае керда хӀамаш эцаргья ишколашка.
«Бераш дешаш йола моттигаш, лакхача боараме тоаяь хила еза. Из лоархӀаме да хьехархошта, иштта берашта. «ЦаӀ йола Росси» яхача парте доакъашхошца, кхыболча хьакимашца, даьй-ноаной кхелаца цу балха тӀахьожам лоаттабу оаха», - белгалдир министра Цхьорой Ахьмад-Башира.
Ахкан тӀехьара бутт чакхбалалехь, тоаяь хила езаш я шаккха ишкол, кердача дешара шера кийча хургйолаш.
