Келаматанаькъан Хьажмурда сийлен «Турпала парта» хьайийллар Галашка
ТIема операцена юкъе ший новкъостий кIалхарбоахаш, вахар хаьдача Келаматанаькъан Хьажмурда хетаяь «Турпала парте» хьайийллар Галашка.Из хоам «Сердалога» бир «Даьхен лорбой» яхача ганза болхлоша.
Цига гулбеннабар администраце болхлой, хьехархой, бIухочун цIен-нана ший шин бераца. Дийша ваьнна диплом хьаэццашехь, эскаре вахар Хьажмурд. Волгоградски областерча Камышин яхача шахьаре 33-ча мотострелкови полке декхараш кхоачашдеш хилар из 2021-ча шера гуйран хана денз, 2022-ча шера саькура бетта тIема операцен юкъе дакъа лоацаш вар. ТIема халача дийнахьа, моастагIа дIандаргаш духьалтувсаш юхаветташ хилар, шийна тIехьа лаьтта салтий лорабе гIертар из. «Денал хиларах» яха майдилг еннаяр цунна, РФ Президента амарах Денала орден яла оттавир вай мехкахо.
