Льюиса караеттача пулемёта ӏоарашув корадир лоаме
Льюис яхача ингалсий караеттача пулемёта ӏоарашув (диск) корадир лоаман моттигашка болх дӏахьош боахкача археологашта. Из хоам «Сердалога» бир «Тӏехьале» яхача тӏоговзанчий Ишкола зарбан болх лелабераша.
Ахкан хана къахьегаш баьхкача археологашта корадир из. Лохера Пхьуй яхача моттиге ингалсий караеттача пулемёта ӏоарашув мишта кхаьчад тохкаш ба тахан вай историкаш.
Хьадувцачох, 1919-ча шерашка Пхьуй яхача гӏалай юрта лечкъа ха йоаккхаш хиннав Орджоникидзе Григорий (Серго). Революцена лаьрхӏа герз хьачукхухьаш хиннав из Гуржий мехкара. Къилбаседа Кавказа революционни оагӏон штаб а цига хиннай, хӏаьта Къилбаседа Кавказе революци яккхар Пхьуй яхача юртара доладеннад.
«Цу хана лаьттар белгалдеш да тахан корадаь ингалсий йоккхача топацара ӏоарашув», - аьлар тхога «Тӏехьале» яхача Ишколе.
Хьалхагӏа «Сердало» газето яздаьдар, 2026-ча шера бӏаьстан хана Лохера Пхьуй яхача гӏалай юрта Къилбаседа Кавказа Граждански тӏема музей хьаелла лерхӏ, аьнна. Йоккхача топацара ӏоарашув а цу юкъе хургда.
