Лоаме хьабийллар «ГӏалгӀай культура а вахар а» яха гойтам
ГӏалгӀай паччахьалкхен, Малсаганаькъан Т. Х. цӀерагӀа мехктохкама музее дӀахьош ба «ГӏалгӀай культура а вахар а» яха гойтам, цига го йиш я къаьнара гӀирсаш, тахан музеерча лоархӀаш йолча хӀамаех кхы а дуккхаяраш.
«Музея болхлоша дувцаргда ГӏалгӀайчен хьаьшашта вай исторех, культурах, Ӏадатех. Укхаза дукха гӀалгӀай вахарера тамашийна моттигаш ювцаргья, цар Ӏадаташ довзаргда. Тха иштта «Пушкински карта» яха федеральни программа я, кагирхой таро я цу картага гӀолла мах боацаш цига хьажа хьабахка», - аьлар «Сердало» газетага из болх вӀашагӀбеллараша.
«ГӏалгӀай культура а вахар а» яха гойтам боккхагӀбарашта а, иштта кагирхошта а, берашта а безалургболаш ба. Цо дикагӀа йовзийтаргья цига венача сага гӀалгӀай культура, истори, иштта шийна хьалха цадайнар го йиш хургья.
Гойтам дӀахьу ЖӀайрахьа (укх адресах: Боди-хьажий урам, №1), из хургба оагӀой бетта 27-ча денга кхаччалца.
