Бусалба мехкашкара баьхкача шейхашта, лоаман моттигаш йовзийтар
КъорӀа дешарашта юкъе дӀайихьача яхьашкара лоархӀаме хьаьший, вай мехка кхаьчача бусалба мехкашкарча шейхаш, лоаман моттигашка баха хилар. Из хоам «Сердалога» бир «Вошал» яхача гӀо деш йолча лоадама ганза доакъашхочо Мамилганаькъан Ӏаддал-Мажита.
«ЖӀайрахьа кхалерча моттигашка гӀолла волавала араваьннараш 8 саг вар. ГӀо деш лелараши иштта вай мехкара кхыбола болхлойи бар царна хьалхабаьнна. Аьрзи яхача моттигера дӀадоладир цар лоаме йовзар. «Ӏарамхи» гостиницерча ресторане хӀама даийта, Бейнера тамашийна хоза моттигаш гойтар хьаьшашта», - йоах тхогарча хоамо.
«ЧӀоагӀа тамашийна, хоза моттигаш я ераш, бӀарг тӀаотташ я кхерах яь гӀишлош. Ма дарра аьлча, чӀоагӀа цецдаьнна да тхо, зӀамигача республике сел хоза Ӏалам, иштта моттигаш хиларах», - дийцар Сайф ибн Али аль-Асри шейха.
