Лоаман моттигашка ялх ОКН гучаяьлар
29.09.2025 09:20
Маьт-лоама юхе уллача Бейни яхача гӏалаш ягӏача моттиге, хьалхагӏа йий ца хайнача нах баьхача пхе гӏалах дисараш, лаьттан кӏалхара малхара кашамаш гучадаьлар Жӏайрахьа-Ахабоарзен паччахьалкхен музея болхлошта.
Гӏайбашта къоастаяь моттигаш, моартола кхерий гуш я цхьайола гӏалаш, цхьан гӏалацара чувоалаш йола кхо моттиг я хьагуш.
«Лаьттан кӏалхарча малхарча кашамашка дӏачухьежача, гуш я йиса тӏехкаш. Царна тӏехьашкахьа цхьаькха цхьа моттиг я. Археологически тохкамаш деш хургба цига дӏахо», - дийцар музея болхлоша.
Гӏалгӏай къаман гӏалашта юкъе дӏаязъергья уж, цигара тохкама балхаш йистедаьлча.
