Лоаман Гӏалгӏайче борза заман нах баьха моттиг гучаяьлар
Гӏалгӏайчен ӏилманхошта республикан лоаман даькъ тӏа корайир борза заманнах баьха моттиг. Из тамашийна моттиг кораяьраш ба Тӏумагӏа архитектуран комплекса гӏалан кӏалха тохкама болх дӏахьош хиннараш,- аьлар «Сердало» газетага цу балха доакъашхоша.
«Тӏумагӏа доазон тӏа тохкама балхаш дӏадоладир 2024-ча шера, «Меттаоттадар» яхача ганза хьаллоацаш. Цу моттигера корайир йоккха культуран оагӏув, топпара гӏирсаш, акха а коа тӏарча а хьайбай тӏехкаш, ши метр кӏоарга лаьттах йоахкаш йола. Къаьстта тохкамхоша терко тӏаяхийтар коа тӏарча кӏоагашта, цу чу лелаяьча хӏамашта, 10-15 см сомал йолча овкъара, пхьегӏа белгалонашта», - аьлар хоамо.
Тохкамхоша яхачох, борза замах нах баьхача моттиге дола сийленг Тӏумхой -Чӏоже корадар, из цхьаькха ӏилма оагӏув хьаеллар да ала йиш я, хӏана аьлча цо тешал ду геттара къаьнача хана Гӏалгӏайчен лоаме саг ваха ӏохайна хилара.
«Гуш да, цун бахьан хиннилга; ӏалама, иштта цигарча мехкала (климата) таронаш наха мегаш хилар, из хиннад вай зама хьакхоллалехь ӏӏӏ-ӏӏ эзараш шераш хьалха Кавказа доазонашка»,-аьлар экспедице кулгалхочо Гаданаькъан Умалата.
