МагIалбика тIема сийлен шахьара №3 йолча юкъерча ишколе, Кавказе тIом лаьттача хана, вай доазон тIа чугIерта моастагIа вохаваь 80 шу дузаш хилара, иштта МагIалбика шахьара РФ тIема сийлен цIи енна 16 шу дизара хетабаь гойтам хьабийллар. Цига къамаьл деш, музея кулгалхочо Албохчанаькъан Зоврбика дийцар, дагалоаттама денош тIадоагIаш хиларах, цар лерхIамах, Сийлахь-боккхача Даьймехка тIом латташ эггара чIоагIагIа, бIаьхагIа хиннача тIема наькъах. Цо иштта белгалдир Кавказе моастагIа чу ца волийташ, цу тIем тIа МагIалбик гIаьрхочоа духьалъэтта хиларах, цIихеза мехкдаьттан шахьар лораеш латаш хиннача ГIалгIайчен бIухоша чIоагIача; низах, герзах виза тIавоагIаш хиннача моастагIчунгара котало йоаккхаш юкъедихьача даькъах», - аьлар «Сердало» газетага МагIалбика шахьара администраце.