ТӀема сийлен шахьар тӀа МагӀалбике, керда автовокзал хьалъергья
12.04.2024 23:12
Карарча шера МагӀалбике хьалъе йолаергья керда автовокзал. Массайола оагӀув чулоацаш оттаяь сурт-проект ший телеграм-канале гойтар ГӀалгӀайчен кулгалхочо Келаматанаькъан Махьмуд-Ӏаьлас.
Цу хьакъехьа дӀабихьача балха тӀа, белгалваьв из проект кхоачашъергйола гӀишлонхо. Деррига эшаш дола, проектаца дувзаденна каьхаташ кийча да.
Из автовокзал хьалъяь яьнначул тӀехьагӀа, хӀанз къаьнара вокзал тӀайола лаьтта дӀалургда, МагӀалбике хьалдеш латтача маьждига хьалхашка наьха машенаш дӀаувттае йиш хургйолаш. Цу тайпара МагӀалбике ши гӀулакх кхоачашде таро я: наха дӀа-юха бахара паргӀато а маьждиге дина гӀулакх леладара аьттув а.
