Суртанчий паччахьалкхен музее, къаман гӀирса Денга кийчлуш ба
ГӀалгӀайчен исбахьален искусствон Паччахьалкхен музее дӀахьоргья, «Ӏадаташ меттаоттадеш: гӀалгӀай къаман гӀирсаца леладу юкъахдехка тӀехкар», аьнна, вӀашагӀъелла кхетаче. Из хетаю къаман гӀирса Денна; хӀара шера, бекарга бутт чакхбоалаш долча кӀирандийнахьа, дӀахьош да из. Цунна чудоагӀаш, из болх вӀашагӀбеллараша гойтаргда хьалха леладеш хинна дото тӀехкар шоаш мишта меттаоттадаьд, къаьнарча бустамга а хьожаш.
«Из кхетаче дӀахьоргья этнографа Хьулахой Алёнас. Цо дувцаргда къаьнарча бустамех, къаман дувхаракеп кердаяккхарах лаьца, гӀалгӀай кхалнаьха гӀирсаш Ӏадатий оагӀонашка диллача хьалха мишта хиннад.
Из довза безам болаш вар оаха вех хьатӀадоагӀача шоатта дийнахьа вай музее 11:00 сахьат даьлча, - аьлар «Сердало» газетага паччахьалкхен музея кулгалхочун гӀончас ГӀайрбиканаькъан Ӏалихана.
Хетаргахьа, ший къаман Ӏадат ца дезаш а из кердадаьккхача дика ца хеташ а, саг хургвац; цудухьа цига гӀалгӀай къаман культурни тӀехьале го безам бараш хургба, аьнна хет.
ГӀалгӀайчен музея болхлоша ма хулла кагирхой тӀахьех; къаман культура, цун Ӏадат довзара, из кердадоаккхача дакъа лацара. Исбахьален говзала оагӀонаш царна йовзийта хьож музея болхлой.
