ХХ-ХХI бIаьшерашка къахьегаш хьабоагIача Къилбаседа Кавказа лакха начIал долча суртанчий балхаш довзаргда бахархошта, хьаьшашта. Из хоам «Сердалога» бир культуран гIулакхех йолча министерствос.

«Малхбоален къамий кхолламах йолча паччахьалкхен музея Къилбаседа Кавказа филиалера тайп-тайпара балхаш юкъедахад цу гойтама. Таханара кхоллам–дунен культуран лоархIаме дакъа долга гойтаргда цу гIулакхо», - дийцар тха газетага. Тайп-тайпарча балхашка хьежаш, хIара суртанчан дог-уйла, оамал йовза йиш я гойтаме, тамашийна долча балхий мах мел лакха ба ховргда гулбеннарашта.