ГӏалгӀай ИЗО Паччахьалкхен музее, Хоронько Игора суртий гойтам хургба
ГӏалгӀай Паччахьалкхен исбахьален искусствай музее дӀахьоргба «Лоаман ГӏалгӀайчен хозал» яха Хоронько Игора лаьрххӀа бола гойтам. Из хетабаьб, гӀалгӀай къаман паччахьалкхен 100 шу дузаш хилара. ГӏалгӀайчен хозал, культура, къаман Ӏадаташ довзаш волча суртанчас шийна из мишта гу гойтад, ший сурташка гӀолла.
«Гойтаме хургда начӀал долча суртанчас, наха воккха говзанча санна тӀаэцача сага кхелла ГӏалгӀайчен лоамашкара сурташ. Цу сурташка го йиш я вай мехкара Ӏалама хозал, говзанчо ший кхолламца из къаьгга хьагойт. Цига хьажа венар искусствон дунен чу вала таро йолаш ва; шоаш морг кхы доаца Хоронько Игорь Борисовича даьхка сурташ гургда царна», - аьлар «Сердало» газетага, республикан исбахьален искусствай паччахьалкхен музее.
«Лоаман ГӏалгӀайчен хозал» яха Хоронько Игора суртий гойтам хургба ардара бетта 1-ча дийнахьа.
