Суртанчий паччахьалкхен музее, Хамхой Лидас говзанч-хьехам белар
ГӀалгӀайчен суртанчий музее, ший балхах дика кхеташ йолча Хамхой Лидас даьре оасашца, гизгашца догамаш деш бола говзанч-хьехам белар. Из хетабаь бар, гӀалгӀай паччахьалкхен 100 шу дизара Ди хьатӀадоагӀаш хилара. ЦӀихезача суртанча-модельера луча хьехамах, даьре оасах цӀайна лаьрхӀа барзкъашта боаллабу маха бе Ӏомалора цига дакъа лоацаш хиннараш, ГӀалгӀайчен паччахьалкхен дезадарий бесаш юкъе а кхувлаш, яхаш, дийцар «Сердало» газетага музея зарбан болх лелабераша.
«Говзанч-хьехам дӀахьош, цӀай долча дийнахьа дог гӀоздоаккхаргдола гӀирсаш дарал совгӀа, берашта а кердадараш Ӏомадир, царна из накъадаргда тӀехьагӀа», - аьлар ГӀалгӀайчен исбахьален искусствай Паччахьалкхен музея керттерча Ӏилман болхлочо Ахтоланаькъан Тамусе.
Кхетаче вӀашагӀъеллаяр «Пушкински карта» яхача программах, цо кагирхошта таро лу культуран кхетаченашка аха, паччахьалкхен чотах билеташ эца. Бераша йоккхача терконца ладийгӀар говзанчага, цар, хоза хеташ, дир шоай хьалхара барзкъашта доахкаду маьхий (брошкаш).
Хамхой Лидас бераш кхетаргдолча тайпара дӀа а хьийхар, ГӀалгӀайчен паччахьалкхен дезадарий бесай белагало а йийцар, бераш Ӏомадир уж бесаш шоай балха юкъекхахьа.
