Кизга Ӏоакъа тӀа сурташ дехка болх дӀабихьар паччахьалкхен музее
Илдарха-ГӀалий тӀарча №1 йолча ишкола дешархошта тамашийна хоза болх бовзийташ хилар, суртанчий паччахьалкхен музея болхлой. Кизга Ӏоакъа тӀа исбахьален сурт дуллача говзанча Хазанаькъан Марета кулгал деш, дӀаяхар из кхетаче.
«Пушкина картаца ювзаенна федеральни программа йоаржаяра тӀехьа дӀахьош бола из болх, сиха караберзабир бераша. Цу говзалах дикка кхетарал совгӀа, цхьацца хӀамай тайп-тайпара сурташ дийхкар цар», - дийцар «Сердало» газетага музея зарбан болх лелабераша. Хазанаькъан Марета берашта ма ярра дӀайовзийтар кизга Ӏоакъа тӀа тайп-тайпара сурташ дехка говзал. ХӀара моттиг мишта тоае еза хайра берашта.
Марета белгалдаьчох, бӀарг тӀа ца отташ, хоза балхаш кхолла йиш я из гӀулакх дикка Ӏомадаьчо. Кагирхой, бераш ишттача балхашта тӀаозаш къахьег паччахьалкхен музея болхлоша. Мехка культура, Ӏадаташ, лорадеш, доаржаду цу мугӀарерча гӀулакхо.
