Паччахьалкхен ИЗО музее болх беш ба «Эрсий суртанчий кхолам» яха гойтам
ГӏалгӀайчен исбахьален говзалий Паччахьалкхен музее «Эрсий суртанчий кхоллам» яха гойтам ба дӀахьош, цига го йиш я советски а цул тӀехьарча ханашка а суртанчаша даь балхаш. Уж совгӀата деннадар дика вовзаш волча российски бизнесмена, уж гулдеш волча сага, мецената Некрасов Владимира. Музее хьабаьхкача хьаьший таро хургья цӀихезача эрсий суртанчий кхоллам бовза, иштта Некрасов Владимира юкъедена дакъа мел доккха да ха.
«Гойтама экспозицена чудоагӀаш да 40 совгӀа басарашца кхелла, графически балхаш, уж да дика бовзаш болча исбахьален искусствай российски говзанчаш кхелла балхаш, цу юкъе СССР халкъа художника Пластов Аркадий Александровича, СССРа халкъа художника Щербаков Борис Валентиновича, РСФСР цӀихезача суртанча Кончаловски Михаил Петровича, СССР халкъа суртанчан Куприянов Михаил Васильевича, иштта кхыболча суртанчий балхаш да», - аьлар «Сердало» газетага ГӏалгӀайчен культуран Министерстве.
«Эрсий суртанчий искусство» яха гойтам дӀахьоргба Паччахьалкхен исбахьален говзалий музее, ардара бетта 1-ча денга кхаччалца. Музея болхлоша хьалхадоаккх «Пушкински картах» цига хьажа йиш хилар,14 шергара 22 шерга кхаччалца ха яьннараш, из карта царга дал, мах боацаш гойтамга хьажа йиш йолаш ба.
