Суртанчий Паччахьалкхен музее, «45-ча шера Коталон бутт» яха гойтам ба
ГӀалгӀайчен исбахьален искусствай Паччахьалкхен музее, «45-ча шера Коталон бутт» яха суртий, кулгаговзалца кхеллача хӀамай искусствай гойтам дӀахьош ба, из хетабаьб Сийлахь-боккхача Даьймехка тӀем тӀа котало яьккха 79 шу дизара. Гойтама чудоагӀаш да гӀалгӀай суртанчий, говзанчий балхаш, цар хьагойт тӀом лаьттача шерашка бӀухой майра латаш хиннилга.
«Цу гойтаме го йиш я ткъаь итт гаргга кхоллама оагӀув, цар хьагойт вай Даьймехка истори. Цунга хьажа йиш я «Пушкински карта» яхача федеральни программага гӀолла, из хургба маьтсела бутт юкъекхаччалца», - аьлар «Сердало» газетага ГӀалгӀайчен исбахьален искусствай Паччахьалкхен музея зарбан болх лелабераша.
Тайп-тайпарча искусствай балха юкъе вайна нийслу тӀема шерий истори.
Искусствос вайна таро лу уж шераш дагалаца, хиннар дагадоха; цар эзача балан, лайнача гӀайгӀан боарам кхетабе; турпалхошта карагӀдаьннар довза; тӀехьа тӀайоагӀача тӀехьенна цар дита масал дувца. Шоай са ца кходеш, вай кхоане бахьан долаш, моастагӀчоа духьалъэттача вай даьшта карагӀдаьннар дицлургдац цӀаккха.
