Шолжа-ГӀалий тӀа кхетаче хилар, Эсамарзанаькъан Ӏалаудина «Ноаной» яха книжка довзийташ
Шолжа-Гӏалий тӀа А.Айдамирова цӀерагӀча Къаман библиотеке «Ноаной» яха Эсамарзанаькъан Ӏалаудина книжка довзийташ кхетаче хилар, из арадаьлар Нохчий Республикан йоазонхой Союза новкъосталца.
Книжка тӀа кӀоаргга дувц автора ший наьнах, Сатуевгӏар Османа Аьсетах. Цун вахара атта доацача, бакъда лерттӀача масалах.
Шийна вахаро хьалхашка нийсъяьча халонашка хьежжа доацаш, Османа Аьсета сага дикагӀа йола оамалаш йолаш кхебир ший дезал - нахаца Ӏимерза, догцӀена, Ӏадаташ лоархӀаш, шоай мохк безаш. Къаьстта из боарам боаца наьна безам бахьан долаш, хьакхеллар из книжка а.
Поэтически сборника автор, ГӏалгӀайче меттел цул арахьа а дика вовзаш ва. ГӏалгӀайчен халкъа артист Эсамарзанаькъан Ӏалаудин ший сийрдача кхолламца наха дукха везаш вола саг ва. Ший иллешка гӀолла цо кхайкабу Даьхенцара безам, даьй лерхӀам, къаман мах бараш лорадар. Кхоллама болх дӏабахьарал совгӀа, цо дика дакъа лоац юкъарлон вахаре. Дукха ха йоацаш из кертте эттар ГӏалгӀайчен Даьхен бӀухой дезала Комитета моттигерча штаба, цо терко лоаттаю бӀухой дезалашта, иштта дакъа юкъедахь юкъарлон дин эздела кӀийле чӀоагӀъеш.
Книжка довзар хилар дикача хьале. Кхетачен хьаьший таро хилар, из довзарал совгӀа, из хьакхоллара истори миштад ха.
Автора даьча къамаьлах, литератораша белгалдир Эсамарзанаькъан Ӏалаудина книжка эггара дега везагӀа волча сагацара - наьнацара къамаьл хилар, наьна безамах, бера вахаре цо дӀалаьцача мах баь варгвоацача даькъах.
Кхолламо, къонгий баркало, безамо, шеко йоацаш, йӀовхал лургья из книжка дешачарна, иштта лоархӀаме дакъа дӀалоацаш а хургда дезалера хьал, къамий Ӏадаташ лорадеча.
