МагӀалбике моастагӀа вохавеш лаьттача бӀухой гойтам ба ИГМК дӀахьош
21.03.2025 09:29
Республикерча паччахьалкхен музее, МагӀалбике фашист вохавеш лаьттача бӀухошта хетабаь гойтам хьабийллаб. БӀухой гӀирс, сурташ, каьхаташ, ишта кхыйола тӀема деношца ювзаенна хӀамаш я цига хьокха оттаяьраш.
«МагӀалбике лаьттача операце лоархӀаме дакъа дӀалаьцар боккхача тӀема исторе. Цу шахьаре соцаваьв фашист, дехьа ца воалийташ. 1942-ча шера гуйран хьалхарча беттагара Ӏан хьалхарча беттага кхаччалца Гитлера эскар юхадетташ, цо лаьрхӀа хиннар дохадеш, лаьттаб вай бӀухой. 1943-ча шера Ӏан шоллагӀча бетта 3-ча дийнахьа моастагӀий арабаха болабаьб МагӀалбикера», - дийцар тхога музее. МагӀалбикера фашист вохавеш лаьттача операце 82 шу дизар дездир мехка.
