ИнгГУ деша хьаэцарца дувзаденнарех дийцар мехка
Деша оттараш тӀаэцаш бола болх чакхбаьккхар, ГӀалгӀай паччахьалкхен университете. Яхь йолча моттигашка 553 саг чакхваьлар, университета бизза студенташ хилар царех.
«Из болх дӀахьоча аьтинга бетта 20-ча денгара кӀимарса беттарча 25-ча денга кхаччалца, деша отта безам болаш дехар чуденнараш 9914 саг ва (2024-ча шера – 701 дехар). 50%-га кхоачаш дола дехараш Госуслуги яхача портале гӀолла чуденнад, дӀадахача шера хинна хьал теркалдича, укх шера шозза айденнад из (2024-18%). Иштта хьахьежабаь деша оттараш а укх шера дукхагӀа ба - 2024-ча шера хиннача 38 сага духьала 69. Къаьстта йолча квотага гӀолла деша отташ хинна тӀема доакъашхой, тӀема операцена юкъе вахар хаьдача бӀухой дезалаш 54 саг вар (дӀадахача шера - 25 саг)», - дийцар «Сердалога» ИнгГУ. Университета студенташ хинна чакхбаьннараш берригаш 754 саг ва.
Цу гӀулакхо хьагойт, лакхарча дешарга кхача ловраш мехка шортта болга. Карарча хана ахчах дешаш хургбараш тӀаэцаш, болх дӀахьош ба университете. Тов бетта 10-ча денга кхаччалца шоай каьхаташ чудала, дешара оагӀонцара болх чакхбаккха аьттув ба мехкахой.
Университета ахчах долча дешара даькъе тайп-тайпара йола дукха дешара программаш я. Вахаре ше хьалаца лаьрхӀача наькъага хьежжа йола моттиг харжа йиш йолаш ба тахан къонабараш.
