ИнгГУ МутаӀаланаькъан Хьаж-Бийкара 115 шу дизара хетаяь яхь дӀайихьар
ГӏалгӀай паччахьалкхен университете дешархой яхь дӀайихьар, из хетаяь яр МутаӀаланаькъан Шовхала Хьаж-Бийкара- цӀихезача гӀалгӀай литературан викала 115 шу дузаш хиларца. Яхье дакъа лоацаш бар ИнгГУ тайп-тайпарча факультетий студенташ. Доакъашхоша гойтар исбахьален дешара говзал, цар йийшар байташ, говзанча хӀара дош ший тайпара хилар белгалдеш. ГӏалгӀай литературан дунен чу кхаьчача санна хетийташ, дег чу дувшаш дар цун байтий дешаш, ма ярра гӀалгӀай метта хозал гойташ.
«Яхье дакъа лоацаш хиннарий балха мах оттабеш бар цӀихеза культуран, литературан болхло, республикан йоазонхой Союза кулгалхо Ноакастхой Х. А., ГӏалгӀайчен суртанчий Союза кулгалхо, йоазонхой Союза доакъашхо Мартазанаькъан М.Я., иштта Новразанаькъан М.М. - республикан йоазонхой Союза доакъашхо», - аьлар «Сердало» газетага ГӏалгӀай паччахьалкхен университете.
Чаккхе еш белгалбир дешарца котбаьннараш, царна совгӀаташ делар. Из дӀаяхьар маӀан дар МутаӀаланаькъан Хьаж-Бийкара кхоллам дикагӀа бовзийтар кагирхошта юкъе.
МутаӀаланаькъан Хьаж-Бийкара доккха дакъа юкъеденад, гӀалгӀай мотт дегӀабоалабеш. Цун кхоллам биза ба кӀоаргача дешаех, ший гӀалгӀай меттацарча боккхача безамах.
