Мехка лорабочун Шера хетаяь кхетаче хилар ИнгГУ
ГӏалгӀай паччахьалкхен университета доазол арахьарча меттайи мехкаш ӏомадареи институте кхетаче дӀайихьар, из хетаяь яр Даьхен лорабой Шера. Кхетаче вӀашагӀъеллараш бар доцент Лаьнанаькъан А., йоккхагӀа йола хьехархо Хазанаькъан Л. Из лаьрхӀа яр студенташта, Даьхенцара безам совбоаккхаш, кхетам балара; цар шоай мехках доаккхал дергдолаш, истори лорадергдолаш, шоай даьшта карагӀдаьнна доккхий гӀулакхаш царна дикагӀа довзаргдолаш. Тахан латтача дунен тӀарча хьалашка эхь-эздела, динца дувзаденна мах бараш чӀоагӀде деза, цудухьа цу тайпара кхетаченаш лоархӀаме я.
«Кхетачен веза хьаьша хилар бӀухо-интернационалист, Афганистане хиннача тӀема доакъашхо, цу тӏема доакъашхой российски Союза моттигерча юкъарлон чувоагӏаш вола, Магас-Шахьара кхела кулгалхочун гӀонча Къоастой Тархан. Къамаьл дӀахьош дийцар Россе, ГӏалгӀайчен тӀема сийлен истори, тайп-тайпарча ханашка вай мехкахоша гойта турпала гӀулакхаш, цига белгалдир исторически дагалоаттам вай тӀехьенга кхачийта безарах, Даьхенцара безам чӀоагӀбе безарах», - аьлар «Сердало» газетага ИнгГУ.
Республикан керттерча вузе дӀахьу, Даьхенцара лерхӀам лакхбеш, кхетам балара болх. Цо таро лу кагирхошта дикагӀа довза шоай мехка истори.
