ИнгГУ яздир Ерригача Россе Iилман-технологически диктант
«Коталон технологеш» яха Ерригача Россе технологически диктант яздир ГIалгIай Паччахьалкхен университете. Исторецарча Iилманца, техникаца дувзаденнарашта терко тIаозаш бар из болам, инженерни говзал дикагIа яржаргйолаш. Сийлахь-боккха Даьймехка тIом лаьттача шерашка тIема аренашка технологеца дувзаденнараш мел доккха дакъа дIалоацаш хиннад дагадохийтар доакъашхошта. Тахан дагадоха, хьоахаде эттача лоархIаме моттиг я коталонга бодача наькъ тIа цу оагIоно дIайихьар.
«ТIом лаьттача шерашка боккха пайда беш хиннарех да унахошта дарба де; когаш тIа ураоттабаь, уж юха тIема аренашка арабовлийта гIо деш хиннараш; тIема аренашкарча бувзама юкъе леладаьраш; криптографи, лоархIаме хиннараш тахка, довза аьттув луш хинна, бIухошта герз, кхыбола гIирс кийчбеш хинна оагIонаш, иштта кхыдараш а», - дийцар «Сердалога» вуза болхлоша.
Доакъашхой жоп тела дийзар дIаяхача ханацарча технологеца дувзаденнача хаттарашта. ТолашагIчарна сертификаташ лургда, иштта ТЕХНОПРОМ яхача Iилманхой, инженераш, цу оагIонцара кхыбола говзанчаш чулоацаш йолча кхетаченгара совгIаташ кхоачаргда царна.
