Эрсий, гӏалгӏай метташта хетаяь олимпиада дӏайихьар ИнгГУ
Гӏалгӏай, эрсий метташта хетаяь олимпиада дӏахьош хилар Гӏалгӏай паччахьалкхен университета филологически факультете. Дакъа лоацаш хиннараш бар гуманитарно-технически, унахцӏенон оагӏонцарча колледжашка дешаш бола студенташ. Лингвистикаца, филологеца бувзам бола къонабараш бовзийташ кхетаче хилар цох.
«Яхьашка эггара керттердараш белгалдир студенташта хьехархоша. Цу юкъе дар эрсий, гӏалгӏай метташ шаьра хар, цар кӏоаргал йовзар, иштта наьна мотт лорабара, цун хӏама цадалийтара тӏехьа кхоачашде дезараш. Къонабарий начӏал довзийташ йола яхьаш дикка пайда беш йолга белгалдир хьалхалаттараша», - йоах «Сердалога» бенача хоамо.
Тайп-тайпара декхараш дар студенташта хьалхашка лаьттараш. Шоай мел йола говзал сомаяьккхар доакъашхоша, ше-ше белгалвала хьожаш. Кхеле багӏараша теркалдир метташцара бувзам цар тахан малагӏча боараме латт.
Дакъа лоацаш мел хиннарашта грамоташ, сертификаташ делар цу дийнахьа. Шоай наьна мотт, иштта эрсий мотт дикка бовза, цун кӏоаргаленашка кхача гӏертилга гуш дар, студенташа гойтачох.
