Ӏилманхоша йийцар, «Сердало» газето гӀалгӀай мотт лорабара йола проекташ
«Сердало» газета керттерча редактора Курскенаькъан Хадижата, «Сердало» газета шеф-редактора Курскенаькъан ИбрахӀима «ГӀалгӀай йоазон никъ» яхача семинаре дакъа лаьцар. Из дӀайихьар, Ӏоахарганаькъан Элмарзий ЧхьагӀа цӀерагӀча Ӏилма-тохкама институте. Из Ӏилман кхетаче хетаяь яр гӀалгӀай йоазон 100 шу диза хилара, Ӏилма-тохкама институте гулбеннабар Ӏилман, культуран, искусствон болхлой.
«ХӀара шин кӀира бовш ба, шоай моттиг йолаш дахача къамий меттаех цаӀ. ДӀадахача шера ООН Генеральни Ассамблеяс дӀаболабир, дунен тӀа дахача халкъашта юкъерча меттай итт шерара болам. Тха семинар кийчъяьй къонача Ӏилманхой Совето, ГӀалгӀайчен юкъарлонна палатаца цхьана.
Из тайп-тайпарча организацей, урхаллений викалаша шоашта хетар, хилча бакъахьа дар ала а юкъедаккха а таро луш йола моттиг я, укхаза дувца йиш я гӀалгӀай мотт дегӀабоалабара хьакъехьа нийслуш дола хаттараш, гойта йиш я ший проекташ. Семинаре доклад йийшар Хайранаькъан Р.Р. («ГӀалгӀай йоазув хьахилара наькъаш»), Къулбужанаькъан Т. А. («ГӀалгӀай мотт лорабара а дегӀабоалабара наькъаш тахан»), Берсанаькъан З.Ю. («ГӀалгӀай йоазув хьахилара наькъаш»)», - аьлар «Сердало» газетага Ӏилма-тохкама института кулгалхочо, филологически Ӏилмай доктора БӀарахой Нинас.
«Сердало» газета шеф-редактора Курскенаькъан ИбрахӀима даьча къамаьлах ховш хилар семинара доакъашхошта, «Сердало» газето гӀалгӀай мотт дегӀабоалабара шийгарча даькъе мел къахьийгад.
