Онкодиспансере чакхваьлар вай мехкара 115 саг
Онкологически диспансеро цӏийоаца лазараш гучадахара тӏехьа дӏахьош бола болам хьаллоацаш, 115 саг чакхваьлар цига. Из хоам «Сердалога» бир цу оагӏонцарча министерстве.
Белгалде деза, из болам дӏабахьара бахьан цӏийоаца лазараш хьакхийттача хана гучадахарца дувзаденна долга. Цунга хьежжа, вӏалла а онкологашта тӏацаихараш бар чакхбоалаш хиннараш. Ханнахьа дарба дӏадоладаро лазар юхатох, из кхетадеш, лорашка чакхбоалаш, дегӏа хьал тохкаш хила беза бахархой.
«Чурча маьженашта, ноакхошта, къамарга узи яккха, наькха КТ, маммографи яккха аьттув бар наьха, иштта цитологически маза дӏачубала а. Дегӏа хьал дика доацараш дӏахо кхы а чакхбаргболаш дӏаязбир лораша.
Массехк саг вар наькха, къамарга оъаца онкологи хилара гарга волаш, дӏахо чакхбаха беза, аьнна, белгалбаьраш», - дийцар тха газетага министерствон болхлоша.
