ГӀишлош йотта, тоае ховш волча 12 сага тӀоговзанчий тешалаш делар
ГӀалгӀайче хьалхара арахецаш бар гӀишлош хьалъе, уж тоае ховш бола тӀоговзанчаш. Царех 12-на тӀоговзанчаш хилара тешал ду сертификаташ делар, яхаш, дийцар «Сердало» газетага ГӀалгӀай Республикан Кулгалхочун зарбан болх лелабераша.
«Цар Ӏомадаьр накъадоалаш хургда, ГӀалгӀайчен лоамара гӀалаш тоаяра деш латтача балхашка. Из гӀулакх вай исторически тӀехьале лораеш хилар да.
ГӀишлош йотташ, уж тоаеш бараш ба къаьнарча а таханарча заман а гӀишлошъяра говзал юкъе а йоалаеш, вай истори сомадаккха ховш бараш.
Баркал оал Гуцаранаькъан Микаила, Султиганаькъан Рамзана, из проект кхоачашъеш хиларах. «ТӀехьале» яха ишкол хьайийллай Лохера Пхьуй яхача историко-архитектуран гӀишлой даькъ тӀа; цо чӀоагӀбу дешара, культуран овла.
Ишкола керттерча кулгалхочо Султиганаькъан Рамзана доккха дакъа юкъедихьад гӀишлош тоае ховш дола ноахал кийчдара, цар лора а ергья, сов а йоаккхаргья вай къаман культуран тӀехьале», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас.
ДӀахойодача хана а, цу тайпара говзанчаш 50 сагага кхоачаш арахецаргба цу ишколера, моттигерча ширача гӀишлошца болх бе ховш хургба уж.
Келаматанаькъан Махьмуд-Ӏаьлас белгалдир цу тайпара дешара оагӀонаш дегӀакхувлара могаш дола новкъостал лоаттадергда, из лоархӀаме да ГӀалгӀайчен куц лорадара, из тӀехьа тӀадоагӀача ноахалга дӀакховдаде йиш йолаш хилийтара.
