Ишколашта юхерча моттигий хьал тоадеш ба мехка
Дешара шерга кийчо еш ба хӀара шахьаре, юрта. Ишколашта юхерча моттигий хьал тоадеш балхаш дӀадоладаьд Наьсаре. Из хоам «Сердалога» бир шахьара администраце.
«Шахьара да волча Оздой Руслана кхетаче дӀайихьар массе куран кулгалхошца, ЖКХ, наькъашкарча хьалах болча къахьегамхошца. Ишколашта гонахьара моттигаш цӀена, лостам болаш, ишкола тӀабодача наькъа кхерамзлен хьал боаггӀача боараме хила дезилга белгалдир кхетаче», - йоах тхогарча хоамо.
Цу оагӀонцарча болхлошта тӀадиллар; моттигаш цӀенъе, наькъашкара бокъонаш белгалъеш йолча гӀармай хьал теркалде; догӀан хишта лаьрхӀа йолча гӀувнашка хьажа, аьнна.
Иштта наькъашка белгало еш хьекха, «ИШКОЛ» аьнна яздаь басараш кердадаха деза, наькъашкара кӀоагаш дӀадукъаш, бордюрий хьал меттадоаладеш, болх дӀахьоргба. Бераш ишколе арадалалехь, чакхбаьккха хила безаш ба массайолча моттигашкара цу оагӀонцара болх.
