Эскаре бахара тӀахьех мехкара кагирхой
14.03.2025 12:14
Эскаре бахара кагирхой тӀахьехаш, болх дӀакхухь вай мехка. Шолжа кхален администраце цу гӀулакха лаьрхӀа кхетаче дӀайихьар таханарча доал дарах, туризмах йолча колледжа студенташца.
«Администраце кулгалхочун гӀонча волча ЦӀечой Беслана, вахара оагӀон хьалхалаттача ГӀулой ИбрахӀима кагирхошта хьалхадаьккхар эскаре бахар лоархӀаме долга. Вахара оагӀон болхлочо Галай Илеза дийцар, эскаре яьккхача хано маӀача сага дегӀа, оамалашта боккха пайда белга, моллагӀвар низа чӀоагӀвелга», - йоах тхога бенача хоамо.
«Эскаре вахар хӀара маӀача сага декхар да, вахаре къонахчоа эшаргдараш шаьрде, чӀоагӀде моттиг я», - аьлар ЦӀечой Беслана.
