Удаш гувнаш тӀа бувлар даржаш латт вай мехка
Вай мехка товш йола спорт – удаш гувнаш тӀа бувлар - йоаржаш латт вайцига, скайраннинг - альпинизм оал цох. Из хоам «Сердало» газетага бир Мехкадаь зарбан болх лелабераша.
«Альпинизми, адари чулоацаш йола «ЖӀайрахь-2024» яха фестиваль дӀайихьай лоаман моттигашка массехказа. Иркутскера, Сахалинера, Ульяновскера, Кемеровера, Самарера, Челябинскера, Приморскера, Башкортостанера, иштта кхыйолча моттигашкара спортсменаш гулбеннабар вай мехка. ГӀадвугаш да, шоай говзал, начӀал хьахьокха тӀехьарча хана дукхагӀа болча спортсменаша вай мохк хоржаш хилар», - белгалдир вай Мехкадас Келаматанаькъан Махьмуд-Ӏаьлас, спорта оагӀонах дувцаш.
Хозача дешашца даькъала бийцар цо яхьий доакъашхой. ХӀара спортсмена дог ураоттадеш, дика дӀагӀоргья аьнна хет уж яхьаш, яхаш, дийцар мехка кулгалхочо. Ший дегӀа низ кхы тӀа чӀоагӀбе аьттув луш спорт я из.
