Кулга оамалца илли оаларий тоаба хьае лерхӀ вай мехка
Кулга оамалца илли оалача наьха тоаба хьае лерхӀ вай республике гурахьа. Россе къорача наьха моттигерча оагӀон хьалхалаттача Тоаркхой Руслана дийцар цох, культуран гӀулакхех йолча министерствон кулгал деча Лаьнанаькъан Залинайца дӀайихьача кхетаче. Паччахьалкхен филармоне болх беш хургья, хӀама дӀахозаш боацача наьха тоаба.
Кулга оамалца илли алар тӀехьарча хана даржаш латт. Масала, Россе иштта болча наха лаьрхӀа долча «Ца оалаш диса дош» яхача театре, кулга оамалца бӀарчча мюзиклаш ю.
Из гӀулакх доаржадара бахьан да, хӀама дӀахозаш беце а, уж нах лакха начӀал долаш, вахаре цхьацца гӀулакхаш леладе ловш хилар. Иштта йолча вай мехкарча тоабан доакъашхоша массанена дӀахьокхаргда; къора, меттаза вале а, илли оалалулга», - белгалдир министерствон хьалха латтача Лаьнанаькъан Залинас.
Кулга оамалца шоай начӀал гойта йиш хиларо цу наьха дог хьоастаргда. Актерски начӀалца, кулга оамалца шоай дега хьал, шоашта хетар дӀахьокха йиш хиларах, доккха совгӀат хургда цу наха.
