ГӀалгӀайче массайолча оагӀорахьара дегӀадоаладергда ший лоӀаме кӀалкхетаргах латар
ГӀалгӀай Республике терко ергья ший лоӀаме кӀалкхетаргах латар дегӀадоаладара, яхаш, хоам бу «Сердало» газетага ГӀалгӀай республикан спорта Министерствос.
«ГӀалгӀай Республикан физически культурах, спортах волча министра Белхарой Руслана, Россе спортивни латара Федераце президентаца Мамиашвили Михаилаца кхетаче йолаш, дийцар къаьстта долча латара спортивни оагӀув кердача шера дегӀайоалаярах. БӀаьсти, вай республике хургья 24 шерага кхаччалца ха яьннарашта юкъера греко-римски латара яхьаш, уж хетаяь я Келаматанаькъан Ӏалихана, цига гуллургба дикагӀа йолча мехка спортивни клубашкара спортсменаш», - аьлар тхоца къамаьл даьчо.
«Латар мехка культура, къаман спорта дакъа да. Из спорта оагӀув вай мехка чӀоагӀа езаш а дика толамаш доахаш а я.
Цу гӀулакха эшаш йола таронаш вай йолаш я, керттердар - спортсменашта юкъе яхьаш чакхйоах», - аьлар Белхарой Руслана.
