Келаматанаькъан ӏалихана денала, турпала никъ бовзаш ба мехка
Российски паччахьалкхен исторе лоархӏаме моттиг дӏалоацаш я Россе ФСБ терроризм яхача зулама духьала къовсам лоаттабеча оагӏон болхло волаш, къахьегаш хиннача Келаматанаькъан Макшарипа ӏалихана цӏи.
2007-ча шерарча тов бетта 17-ча дийнахьа, хаьдар цун вахара никъ. Цун гаргарча, бовзаш, из везаш, цунца цхьана болх дӏахьош хиннача наха дикача дешашца дагалувц деналах визза хинна из къаман эздий воӏ.
Россе Президента амарца, 2007-ча шерарча лайчилла бетта 4-ча дийнахьа Россе Турпал яха цӏи чӏоагӏйир цун тӏехьа. Кхерам яхача дешо юха ца тохаш; хьинарца, боккха низ ӏобилла ший болх дӏахьош лаьтта эпсар Денала орденца, майдилгашца белгалвир.
Эггара халагӏа йола ха эттача хана, зуламхошта духьала къовсам лоаттабир цо, ди-бийса ца къовсаш.
Террористашта, зуламаш доаржадеш мел лийннарашта духьаллаьттар из, ший вахара никъ хаддалца.Республике, иштта берригача мехка машар, цхьоагӏо оттар, нах цхьаккха хӏамах кхераш боацаш, паргӏата бахар дезар Келаматанаькъан ӏалихана.
Тахан из вовзаш хиннарашта иштта волаш дагаух из; кхувш латтача тӏехьенга дувц, турпал хиннача къаман сийдолча виӏий вахара наькъах. Цун цӏи лелаеш урамаш, дешара моттигаш, спорта яхьаш я мехка.
Дешархоша, студенташа цун къахьегамах бизза хиннача вахара наькъа хетаяь кхетаченаш дӏакхухь хӏара шера. Дуккханешта масал долаш ваьхар из саг, шийна тӏехьа сийрда, турпала гӏулакхех йизза йола цӏи юташ.
