Россе хьалхарча турпала Осканаькъан Сулумбика хетаяь кхетаче дӏайихьар мехка
Пхьилекъонгий-Юрта дӏайихьар Россе эггара хьалхарча турпала, лётчик хиннача Осканаькъан Сулумбика хетаяь кхетаче. Культуран Цӏен болхлоша юртарча № 1 йолча ишкола дешархошца дӏабихьар турпала вахара никъ бовзийташ бола из лоархӏаме болх.
«Дукха нах бар гулбенна хиннараш. Турпала гаргара нах, иштта везараш, вовзараш баьхкабар цунна хетаяьча кхетаче дакъа лаца. Царна юкъе бар Наьсара кхален вахара оагӏонцарча моттига кулгалхо Саганаькъан М., «Бералла наькъаш» яха проекта кхоачашъярга хьожа Гӏоанадлой А., «Хьалхарчар болам» яхача оагӏон доакъашхо Кхоартой Л., республикерча къаман кхоллама Цӏен исбахьален оагӏонцарча балха кулгалдеш йола Абдурзаканаькъан А., иштта дешархой, студенташ, библиотека болхлой», - дийцар «Сердалога» Культуран Цӏен кулгалдеча Горчхананаькъан Марета.
Осканаькъан Сулумбика гойта турпалал ерригача Росси моттигашка довзаш, лоархӏам беш да.
Шийна тӏадехка декхараш дизза кхоачашдеш лаьттарех ва вай мехкахо. Цун вахара наькъах, цун деналах, оамалех дувцаш къамаьл дир гулбеннараша.
Кхыболча наха зулам ца хилийта, аьнна, вай мехкахочо гойтар цхьаккха а ханашка дицлургдоцарех да.
