Мехк дӀайихьар, цӀерца къовсам лоаттабара спорта Хьалхале яккхара яхь
Цӏерца къовсам лоаттабеча Илдарха-Гӏалан №4 йолча даькъ тӀа дӀадоладелар цу лостамагӏарча спорта хьалхале яккхар, из хетаяь яр Россе МЧС 35 шу дизара.
Пхе тобах латтача доакъашхошта хьалхашка декхар оттадир, лоаме тӀагӀолла шоллагӀча, йиълагӀча гӏата тӀа балар. Котало яккхар духьа, цу хатарца къовсам лоаттабеча ялх даькъа болхлоша, иштта пхе ишкола, цхьан колледжа викалаша шоай низ гойтар.
Дуккхабараш тайп-тайпарча яхьашка дакъа лаьца а бар, цу юкъе ерригроссийски яраш а йолаш. Уж дика кийчлуш бар яхьашка, из хьагойташ дар уж хьалхара моттигаш яха гӀерташ хилар, - аьлар ГӏалгӀай Республике гӀолла йолча Россе МЧСа Керттерча цӀера хетара духьала къахьегарий урхаллен отдела кулгалхочо Могушканаькъан Ахьмада.
Хьалхарча дийнахьа дӀайихьача яхьашка, лоаме тӀагӏолла ӏомалуча гӀалан 2-ча гӏата тӀа валарах, 14 шу даьннарашта, иштта зӀамагӀчарна юкъе хьалхара моттиг яьккхар Дебаранаькъан Ислама – Наьсар-Кертерча №19 йолча юкъерча ишкола дешархочо.
Мехкарий даькъ тӀа 14 шу, кхы кӀезигагӀа даьннарашта юкъе толаш хилар Наьсар-Кертерча цу ишкола дешархо Дебаранаькъан Сара.
БоккхагӀбарашта юкъе (ондаргаш 15-16 шу) коталон лагӀа тӀа эттар паччахьалкхен а муниципальни а гӏулакха колледжа (КГиМС) студент Харсенаькъан Илез. Мехкарий даькъе котало яьккхар Илдарха-Гӏалан №7 йолча юкъерча ишкола дешархочо Шутуранаькъан Хаде. Ондаргашта юкъе (17-18 шу) дикагӏбарех хилар Боканаькъан Акромат – КгиМС.
Лоаме тӀа гӀолла 2-ча гӏата корах чувалара даькъ тӀа ондаргашта юкъе хьалхара моттиг яьккхар Къоастой Раянас - КГиМС.
Цу тайпара гӀишлон 4-ча гӏата тӀа баларах долча даькъе, боккхагӏчарна юкъе (19 шу) котбаьлар: Тӏонганаькъан ИбрахӀим, Магаса 9-ча ПСЧ ха дара даькъ тӀара кулгалхо. Цо хьалхара моттиг яьккхар;
2-гӀа моттиг Къоастой Илезага кхаьчар – Шолжа-Шахьара ПСЧ 3-ча отделене командирага;
3-ча моттиге Гоамакортанаькъан Руслан хилар, Тӏой-Юртарча 12-ча ПСЧ кулгалхочун гӀонча.
Из ха йолча (19 шу) мехкарашта юкъе, лоаме тӀагӀолла дешара корпуса шоллагӀча гӏата тӀа баларах котбаьлар:
1-ра моттиг- Коновалова Ульяна (6-ча ПСЧ тоаба викал);
2-гӀа моттиг - Гадаборшанаькъан Раиса (4-ча ПСЧ викал;
3-гӏа моттиг- Субботина Екатерина (9-ча ПСЧ викал).
