Кердадарех йолча шоллагӏча Ишколо ший болх дӏаболабир мехка
Наьсарерча № 1 йолча гимназе хьайийллача кердадарех йолча ишколо ший болх дӏаболабир. Кагирхой кхоллама оагӏонцара начӏал хьаллацара тӏехьа дӏаболабаь болх ба из. «Сердалога» из хоам бир мехкарча Паччахьалкхено. Таханарча хано дӏадеххача тайпара, вӏашагӏъелла из дешара моттиг 11 шергара 17 шерга кхаччалца волча 100 сага моттигаш луш я. Тайп- тайпара дола керда оагӏонаш довза, шоашта ховр дикка шаьрде аьттув ба цига берий. Кхоллама проекташ йоаржае эшаш мел дар оттадаь, боаггӏача боараме кийчъяь латтача ялх студе дешаш хургда бераш.
«Кердадарех йола шоллагӏа ишкол республике хьаеллар тахан вайна чӏоагӏа лоархӏаме да. Начӏал долча къонача тӏехьен шоашта ховр дикка доаржаде, цох пайда эца боккха аьттув ба из. Тахан вай мехка чӏоагӏа къахьег, цхьацца говзал йола кагирхой из хӏама дикка шаьрдаь, беркате хургйола профессеш хержа республике къахьега бусаргболаш, мехка накъабоалаш хургболаш. Тахан укхаза ӏомадаьр, дайзар, кхоана цхьа никъ хьалаьца, цхьан гӏулакха тӏехьа къахьега болабелча; накъадаргда царна.
Вай мехкарча экономикан хьал хьаллацара тӏехьа а дикка пайда беш хургда из», - белгалдир Паччахьалкхен кулгалхочун гӏонча волча Мутаӏаланаькъан Хьажбикара. Шин шера йолча дешара программанна юкъедараш : звукорежиссура, мукъам вӏашагӏболлар, VR/AR хьакхоллар, 3D-моделировани, анимаци, сурташ, видеографи, веб-дизайн, иштта кхыдараш а. Дешара юкъе къаьстта йоккха терко ергья тоабанца болх бе хара, кӏоаргга уйла еш хилара.
Курс чакхъяьлча сертификаташ хьаэцаргда дешархоша. Из лоархӏаме, боккха пайда беш йола проект РФ культуран гӏулакхех йолча Министерствос хьаллоацаш, «Россе хьадаьр» яхача федеральни проектага гӏолла йоаржаеш я тахан. Кердадарех йола ишкол хьаеллар вай мехка кхоанен хьал тоадеш гӏулакх да; лакха начӏал, говзал йола кагирхой мехка кхебара тӏехьа баьккха лоархӏаме гӏа ба из. Цхьацца хӏаман тӏехьа говзал йолча берий оагӏув хьаллоацаш, царна гӏо деш йолча цу проекта тахан лакха мах ба.
