Кагирхой Спартакиада дӀайолаелар мехка
Йоккхача спорта лаьрхӀача кхетаче дакъа лоацаш бар спорта гӀулакхех йолча Министерствон хьалха латта Белхарой Руслан, цун гӀонча вола Султиганаькъан ТӀахӀир, иштта къона спортсменаш. «Сердалога» из хоам цу моттигера бир.
2007-2014-ча шерашкара къонабараш хьалхабоаларгах идар цига, иштта турника тӀа шоай низ хьокхаш, муш дӀа-хьа увзабеш, ше-ше котвала гӀерташ къайсар.
«Республикан ерригача моттигашкара къона спортсменаш гулбеш дола доккха цӀай да спартакиада. Яхьашка дакъа лоацаш я мехкара юрташ, шахьараш. Царна юкъе я Наьсаре, Илдарха-ГӀала, МагӀалбик, Ӏарамхи.
Спартакиаде котбала гӀертараша чӀоагӀа къахьег, хӀаране ший низ, говзал гойтаргья цига. Аьттув хилба яхьашка дакъа лоацарий.
ХӀаьта вай самукъадаргда кагирхоша шоай низ гойтача яхьашка хьожаш», - белгалдир министра.
Цу гӀулакхаца керттердар - вай кагирхой, ураотташ латта къона тӀехье физически культураца, спортаца бувзам лелабара тӀахьехар.
Кагирхой Спартакиада шоллагӀа бӀал укх беттарча 6-ча дийнахьа Наьсарерча Овшанаькъан Рашида цӀерах йолча стадионе дӀахьоргба.
