«СВОи Турпалаш» яха телепроект дIайолаяьй мехка
«СВОи Турпалаш» яха проект я «Магас» телеканало, «Даьхен лорбой» яхача ганзо цхьана дIахьош. ТIема операцена юкъе турпалал гойташ латтарашта хетаяь я проект.
Автор йолча Хученаькъан Седас белгалдечох, таханарча ханацарча турпалех дувцаш хургья проект. Цу гIулакха керттера декхар - деналца, майралца шоай вахара никъ дIахьош болча наьха цIераш йиццаялийтар.
Къаьстта моттиг дIалоацаш хургья проекте вахар хаьдача бIухоех яь передачаш. Цул совгIа, ганза мехкарча филиало хIара денна дIахьош бола болх бовзийтаргба мехкахошта.
«Проекта керттера декхар - СВО доакъашхошта, цар дезалашта гIо деш, массахана терко лоаттаяр лоархIамеча гIулакхех долга дIахайтар, иштта тIема операце доакъашхой вахарца дувзаденнараш довзийтар», - белгалдир ганза хьалха латтача Оздой Муслима.
