Шолжерча цхьан ишкола кулгалхочунна бехк бу къоал дарах
18.02.2025 15:00
Россе МВД «Сунженский» оала МО тохкама отдело зулам дарах дола гӀулакх хьадийллар 47 шу даьннача Шолжерча ишкола кулгалхочунна духьала. Из бехке ву бюджетера 1,7 млн ахча лочкъадарах, яхаш, дийцар «Сердало» газетага ГӏалгӀай Республике гӀолла йолча МВД зарбан-болх лелабераша.
Тохкамхоша дӀабихьача балхах гуш долчох, ишкола кулгалхочо 57 шу даьнна шеф-повар балха оттавир, цу юкъе цун банковски карта а леладеш. 2020 шера тов бетта 1-ча дийнахьа денз 2024 шера оагӀой бетта 25-ча денга кхаччалца, цу сага цӀерагӀа ахча хьатӀадоагӀаш хиннад цу карта тӀа, из кулгалхочо шийна дитад, «болхлочунна» вӀалла ховш хиннадац ше балха вий.
Тохкама болх дӀахьоча юкъа, республикера араваргвоацаш долча каьхата кулг яздаьд цо.
